Hekl og prjón

Ég uppgötvaði það þegar ég var að renna í gegnum færslur á blogginu á dögunum að ég hef barasta ekkert komið inn á handavinnu núna í dágóðan tíma ( nema gula peysan góða...er nokkur búin að gleyma henni?!)

En ég hef sko allt annað en setið auðum höndum og það verða þó nokkrir mjúkir jólapakkar frá Espiflöt þetta árið. Mér finnst svo gaman að búa til eitthvað í gjafir handa öðrum. Þar fer ekki öll vinnan i handverkið sjálft heldur legg ég alúð í að velja hvað á að gera handa hverjum, úr hverju, hvaða litir og hvernig á að raða þeim saman.....

Þessa helgina var ég einmitt í því að ganga frá endum, þvo prjónlesið og leggja það til - hér má sjá afraksturinn:

Þegar þessu var öllu lokið áttaði ég mig á því að ég væri einungis með eitt verk á prjónunum, þessa lambhúsettu eftir uppskrift sem hægt er að nálgast frítt inná tinna.is:

En þar sem að mér líður yfirleitt best með nokkur verkefni í gangi í einu þá opnaði ég koffortið og náði í eitthvað af því garni sem til er og náði svo í nokkrar vel valdar bækur og hófst handa við að velja uppskrift:

Ég hugsa að eftir smá stund þegar ég er búin að vinna SÍÐASTA skólaverkefnið þá fitji ég upp á peysu úr plötulopanum sem þarna er á mynd!